عند لقاءك مع طفلك لاول مرة
سنتعرف على شكل و تصرفات طفلك في أيامه الاولى
القسم الخاص بمراحل النمو الأولى للطفل
بعد انتظار تسعة اشهر وبعد ما خلاص بقي حقيقة ملموسة قدامك - ما تقلقيش لو كان شكل طفلك مختلف عن ال اتخيلتيه له
يعني ممكن تلقي راسه غير منتظمة وبشرته مجعدة ومشعرة - لونه مختلف - انتفاخ عينه
كل دي ظواهر طبيعية جداً ناتجة عن وجوده تسعة أشهر في الرحم بالإضافة لرحلة الولادة الشاقة والمهلكة له
فخروجه من الرحم و وصوله للخارج يعتبر انتصار له بفضل الله
ولو كان بيتكلم وبيعرف يعبر كان رفع ايده زي المنتصرين و قال انا جيت
فلا تقلقي - في خلال ايام أو اسابيع على الاكثر بعون الله - هتزول كل الأعراض ويبقى أجمل بكثير من ال كان في خيالك
لون البشرة
بعد الولادة على طول بيكون لون الطفل مائل للبنفسجي - وده بسبب المجهود والضغوط ال اتعرض لها اثناء الولادة ومن اهمها مسئلة تعرضه لاستنشاق الهواء لاول مرة بعدما كانت الرئة لا تعمل داخل الرحم
وبالطبع هتستعيد البشرة لونها الوردي الطبيعي ( ال بنسميه الحمرة الوردية ) مع الوقت
شكل الرأس
وقت الولادة بتاخذ الراس شكل قرطاسي ( مدببه من اعلى الراس لجهة الخلف ) وده لأن مرونة عظام الجمجمة عند الطفل هي ال بتسهل مروره في حوض الأم الضيق أثناء الولادة
فـ تلاحظي أن راس الطفل شكلها غير منتظم وطبعا هتستعيد شكلها الطبيعي مع الوقت
ملمس الرأس
هتلاحظي وجود فراغين ( يافوخين ) في عضم جمجمته تحت الجلد على طول - واحد فوق الجبين وده كبير نسبياً - والثاني اصغر حجما منه وموجود في موخرة الجمجمة
وضع طبيعي تماماً ... لأنهم مسئولين عن توفير الليونة لعضم الجمجمة وبالتالي تسهيل عملية الولادة عليكي وعلى طفلك
فـ سبحان الله فعلاً
ومع ذلك خلي بالك - لازم تتعاملي معها بحذر شديد جداً - لأنها رقيقة جداً وما تضغطيش عليها .... وطبعاً الفراغين هيختفوا تماماً مع اكتمال عضم الجمجمة - هتختفي الخلفية بعد الولادة بايام والامامية عند سن السنة ونصف تقريباً - وكله بإذن الله
ثدي الطفل
عند بعض الاطفال سواء كانه أولاد أو بنات - حديثي الولادة - ممكن نلاحظي تورم الثدي
وبالضغط عليه ينزل سائل شبه اللبن ( ابيض شوية ) - وده كمان شئ طبيعي ومش هيستمر لفترة طويلة وهيروح لوحده
المهم انك ما تضغطيش على ثدي المولود لغرض عصره واخراج اللبن - لأن دا ممكن يدخل ميكروبات ويعمل خراج لا قدر الله
فـ احسن حل سيبيه زي ما هو كدا - اما لو حسيتي ان المنطقة وارمة زيادة عن اللزوم - راجعي الطبيب فوراً
حيض كاذب
ممكن برده تلاحظي وانتي بتغيري لـ بنتك - ان هناك قطرات دم في منطقة الجهاز التناسلي
وده ما هو الا حيض كاذب وله اسبابه الطبيعية وهيروح لوحده مع الوقت ما تنزعجيش
السُرّه
عند الولادة يربط الحبل السري بملاقط بلاستيكية على مسافة 2 سم من السره - فإن كان اول طفل لكي - قد يبدو المنظر مقلق
لكن لا داعي لذلك - لأنه بعد 6 إلى 14 يوم سوف يذبل الحبل ويسقط لوحده ومعه الملقاط
لكن من المهم جداً تنظيف السره بالكحول الطبي الابيض - 4 مرات يومياً بقطعة قطن طبي - وتعملي مساس بيها على السره
حتى يسقط الحبل - و كرري العملية بعدها كمان اذا كان فيه افرازات بداخل السره
العينين
الانتفاخات الناتجة عن الولادة بتؤدي إلى الاعتقاد بان العينين بهم ميل إلى الحول -ايضاً لا تنزعجي - كلها ايام معدودة و يختفي الانتفاخ ويأخذ الأنف الشكل النهائي ويصبح كل شئ زي الفل
ايضاً - لون العينين بيكون مائل إلى الازرق ( سوده واطارها مزرق او زيتي وفيها شوية زرقة - المهم هتلاقي في لون ازرق خفيف ظاهر ) - لكن لا يمكن تخمين لون العينين الحقيقي بعد كدا هيبقى ايه
وضروري استخدام قطرة مضاد حيوي ( الدكتور يقولك عليها ويكتبها بـ روشيتة ) ودي حماية لعين الطفل ال من الممكن ان تكون قد تعرضت لميكروبات اثناء الولادة
الوزن
طفلك هيفقد شوية من وزنه في أول كام يوم من حياته وده وضع طبيعي و متوقع
أولاً : لانه بعد ولادته بيخرج مع البراز كمية من السوائل اللزجة ال كانت معاه طول فترة الحمل وكانت عملاله منظر
ما بقاش ليها اي احتياج دلوقتي
ثانياً : المجهود ال بيبذله في عملية الرضاعة ما بيقدرش يعوضه بكمية لبن كافية توازي المجهود ده
كان الاول اكله بيوصله على الجاهز عن طريق الحبل السري - زي الباشا بدون مجهود
هنا بيجي دورك إنك تساعديه في الحصول على اللبن الكافي وده عن طريق تعليمك لنفسك ولطفلك كيفية الرضاعة الصحيحة
علشان يستعيد الوزن ال فقده وينمو بصحة وعافية إن شاء الله
دليل وجبات الطفل الرضيع حسب الشهر
ارشادات تفصيلية حول تغذية الطفل الرضيع
دليل وجبات الطفل الرضيع حسب الشهر
ارشادات تفصيلية حول تغذية الطفل الرضيع
إنكماش اليدين والرجلين
ممكن يحتفظ المولود الجديد بوضعية منقبضة ( شبه السلحفا المقلوبه ) مع عدم القدرة على مد يديه و رجليه - ده طبعاً ناتج عن الوضعية التي تعود عليها داخل الرحم - وعملية مد الاعضاء هي عملية متواصلة بتدوم من خمس إلى ست اشهر
إصفرار اللون مهم جداً
معظم الاطفال بيظهر عليهم لون أصفر على الجلد أو في بياض العين ودي اسمها صفراء فسيولوجية ( يعني أمر طبيعي ) بيسموها الناس الصفرا .. والصفراء لها اسبابها العلمية
المهم انه أمر طبيعي لا يزعجك - كل المطلوب - قياس نسبة الصفراء في دم طفلك في اقرب مستشفى ( شئ ضروري للحيطة والحذر ) ... ومن الطبيب تعرفي إذا كانت النسبة دي تحتاج لتدخل طبي أو انها في حدودها الطبيعية
وفي حالة التدخل الطبي برضه ما تقلقيش - لأن ده بيستوجب وضع الطفل تحت ضوء ازرق في الحضانة بضع ساعات
ويجب التنويه هنا - على ان الأباجورة الفلورسنت ( واللمبات الموفرة البيضاء ) في البيت - لا تفيد
الختان أو الطهارة
تتم الطهارة للذكور فقط وليس للإناث - من المستحب ان يتم الختان للذكور أول يوم بعد الولادة - واذا لم يتم لأي سبب - فيكون بعد 40 يوم من الولادة
فطريات على لسان طفلك
يمكن أن تلاحظي وجود بعض النقاط البيضاء على لسان طفلك او على سقف الحلق - هذا امر طبيعي وساعات يكون بسبب اللبن - لا تقلقي لكن استشيري الطبيب حتى يصف لكي العلاج المناسب - لان وجود هذه الفطريات قد تزعج الطفل اثناء الرضاعة
طبيعة الطفل
ممكن الطفل يتبرز اكثر من خمس مرات يومياً وده انعكاس طبيعي جدا انه بعد كل وجبة يتبرز - يعني لا تعتبريه اصيب بالاسهال
كمان ممكن يكون بيعاني من امساك وده لو عدى على الطفل 24 ساعة بدون ان يتبرز - في الحالة دي احسن تستشيري الطبيب لان الامساك هنا بقى ممكن ان يتسبب له في مغص
المغص
طبيعي ان الطفل في ايامه الاولى يصاب بمغص ودي نتيجة انه مش متعود على عملية الهضم التي تبدأ مع اول يوم رضاعة له - وهناك مهدءات للمغص بانواع مختلفة ( زي بيبي درينك - بيبي لاك ) لكن استشيري الطبيب قبل استخدامها
تحليل الغدة الدرقية مهم جداً
طبيب الاطفال المسئول عن طفلك - سيوجهك لانك تروحي مكتب الصحة في خلال اسبوع من الولادة - علشان يتم اختبار للطفل و هو اختبار لنسبة هرمونات الغدة الدرقية
وده بيتعمل بشكة بسيطة في كعب قدم الطفل - يعني اوعي تترددي في انك تعملي التحليل ده لانه مهم جدا
واغلبية الناس بتنتظر وقت التحليل - لاستخراج شهادة الميلاد بالمرة في نفس اليوم
يعني شئ معروف وبقى طقوس
واحب اطمنك - ان من ضمن الاجراءات الروتينية لأي عملية ولادة في اي مستشفى حتى لو مستشفى حكومي - أن طبيب الاطفال المتخصص بيقوم بفحص المولود فور ولادته ومراجعة كل الاحتمالات علشان تطمني على طفلك سالماً معافى إن شاء الله
بكدا بقى نتفق تاني ...بلاش تزعجي نفسك وتكهربي الجو.... ولو شكيتي في اي حاجة عليكي وعلى الطبيب
جدول التطعيمات الضرورية لطفلك حديث الولادة - طبقاً لوزارة الصحة - اضغطي هنا
لتصفح الموضوعات الخاصة المراحل الاولى لنمو طفلك اضغط هنا
لتصفح الموضوعات الخاصة المراحل الاولى لنمو طفلك اضغط هنا
